الكتابة أسلوب حياة: نصائح تهمك في كتابة المحتوى

اتكلمنا قبل كدا عن الفرق بين الCopy Writer و الContent Writer ...
وقلنا تعريف بسيط وسريع يوضحهم بس طبعاً الشرح مش كفاية ولازم تعرف شوية نصايح تساعدك على الكتابة... 😉

وخلينا نتفق إن النقاط دي ممكن نطلق عليها اسم "الكتابة اسلوب حياة"
ليه قلنا كدا... عشان فعلاً إنت لو حابب المجال وعايز تبقى كوبي رايتر لازم وقتها تاخد الكتابة أسلوب حياة في كل حاجة في حياتك .. ويلا نبدأ بأولى النقاط

1- حدد جمهورك المستهدف
دي بداية الخيط.. لازم تعرف إنت هتوصل كلامك لمين "ذكور ولا إناث، أطفال ولا كبار، المستوى التعليمي، اهتمامتهم إيه"

2- ابدأ بلماذا مش ماذا
اشرح لجمهورك ليه ممكن تشتري المنتج دا ...
مثلا: لو بتسوق لمنتجات ملابس فأنت هتقول جودة الهدوم، السعر مقارنة بالأسواق التانية، سرعة الشحن، عروض بتتقدم باستمرار...
على العكس لو بدأت بماذا .. يعني هتقله وقتها إنك بتبيع ملابس للرجال والسيدات وعندك شحن ومتوفر مقاسات وألوان...
بص كدا ""العب على المميزات وبروزها في أول كلامك واخطف عين عميلك بكلامك الحلو""

3- المختصر المفيد
إنت جاي في دماغك دلوقتي وبتقول "ما هو بيتكلموا كتير يعني اشمعنى" ... هقلك ما دا عشان الشرح والله مش أكتر
لكن في التطبيق العملي إنت محتاج تختصر في كلامك ...
هو مش هيقرا مقال كامل على السوشيال ميديا بتحكي فيها قصة منتج من أوله لآخره هيزهق ومش هيكمل قراية للآخر
حط النقاط المهمة و قسم المحتوى بتاعك على بوستات واعمل "كامبين- حملة" متتابعة أفضل بكتير
*توضيح مهم ليك ...
الكلام دا يخص الكوبي والكونتنت .. لكن زي ما اتفقنا إن الكونتنت بيكون فيه شرح أكتر وكلام أكتر لكن من المهم إنك تكتب فيه الكلام المفيد والشرح الأساسي بدون مقدمات مبالغ فيها

4- اختار فكرة واحدة
في كل مرة هتكتب فيها محتوى اختار نقطة أو فكرة واحدة تتكلم فيها
مثلا مرة تتكلم عن سعر، بوست تاني عن رأي العملاء، بوست تالت عن طريقة الدفع أو الشحن وهكذا...

5- صاحب العميل
في كل مرة وإنت بتكتب بلاش يكون أسلوبك فورمال وجامد خاصة لو كان جمهورك من الشباب...
اكتب المحتوى وكأنك بتقدمه لكل واحد بيقراه بشكل شخصي ...
بلاش تقول "هما، إحنا ، نحن.." واستخدم بدالها "إنت، علشانك، ليك"

6- الصراحة حلوة
مش لازم تقول حاجات مش موجودة أو تكاد تكون ناقصة في منتجك وبعد الشراء من العميل واكتشاف مشاكل تخسر مية ...
اسرد فقط المميزات المتاحة في المنتج الخاص بيك وبدون مبالغة بردو ..
بلاش "أقوى باور بانك ممكن تشتريه بأرخص سعر"... وبداله ممكن تقول "باور بانك بسعر ... ويدوم معاك 12 ساعة بدون شحن"

7- اختم بال Call To Action
زي ما قلنا قبل كدا إن المصطلح دا هدفه إن العميل ياخد خطوة فعلية اتجاه المنتج الي بتقدمه زي الشراء أو الحجز...
في نهاية كلامك حاول تحطله كلمات لخطوات فعلية زي "اتصل الآن، احجز، اشتري.."

8- المراجعة النهائية
زي ما كنت بتراجع قبل نهاية تسليم ورقة الإجابة ... لازم كمان تعمل الخطوة دي قبل تسليم المحتوى أو نشره...
ممكن تلاقي غلطة إملائية وممكن تلاقي معلومة ناقصة
ممكن تكتشف أصلا إن المحتوى ملغبط .... لازم تقرا وتسمع الكلام الي كاتبه مرة واتنين لحد ما تحس إنه بسيط ومفهوم
دي كانت أهم وأبرز النقاط الي ممكن تساعدك في الكتابة كبداية في حاجات كتير تانية مهمة هنتكلم عنها... 😎

الفرق بين الCopy Writing و Content Writing

وأنت بقى شاطر في الCopy Writing أكتر ولا Content Writing ؟ 
ها.. هو في فرق؟ 
أيوة طبعاً
تقريباً شاطر في الاتنين....
ما هو مفيش تقريباً هو يا شاطر فيهم أو لا 😑
طيب بعيداً عن الخناق وإنك مش عارف إنت أحسن في إيه ولا حابب تتخصص في مين 
تعالى كدا براااحة وبهدوووء نقلك الفرق بينهم عشان لما تقول إجابتك بعد كدا تبقى متأكد منها
أولاً: يعني إيه كوبي رايتر؟🤔
الكوبي رايتر دا زي ما تقول كدا عليه "مندوب مبيعات شاطر" ... 
بس بدل ما هيقف ويقلك يا فندم تشتري مني المنتج دا ويقنعك بيه.. 
هو هيكتبه وتقراه من مكانك وهتقتنع بيه بردو والهدف الأساسي منه هو "الهدف البيعي" .. 
الكوبي رايتر بيعتمد أنه يوصلك المعلومة – في أقل عدد من الكلمات – بشكل مقنع 
مش كدا بس... هو بعد ما بيوصل القارئ لمرحلة الإقناع بينقله لمرحلة التفاعل والي هو بيسمى الCall To Action وليها اختصار "CTA" 
ودي معانها أنه بيطلب منه ياخد خطوة فعلية اتجاه المنتج أو الخدمة زي إنه يحجز المنتج، يشتريها أو يحمل المحتوى أو الكتاب المقدم أو أي خطوة فعلية تدل على اهتمامه بالمنتج . 
زي ما قلنا الكوبي رايتر بيكتب في عدد سطور محدودة ولكن لازم تكون إقناعية وتحتوي على المعلومة الي محتاجها القارئ.

ثانياً: مين الكونتنت رايتر؟ 🤔
دا بردو شخص برنس في نفسه لا يقل أهمية عن زميله الكوبي رايتر ... 
بس المرة دي الكونتنت رايتر مش بيكون هدفه "البيع أو الإقناع للشراء" على قد ما هو يقدم معلومات عن الخدمة والمنتجات. 
هو بيسرد لك تفاصيل المنتج وبيقلك على كل معلومة تخصه – في عدد كلمات أكتر- مع مراعاة أسلوب الكتابة الي هيجذب بيه القارئ يكمل القراءة لآخر سطر. 
أيوة يعني دا الهدف بس؟ 
بردو لا ... 
الكونتنت رايتر بيقوي علاقة القارئ بالمنتج.... 
طب إزاي؟ الكونتنت رايتر بيدور هو إيه الي ناقص القارئ، مشكلته إيه ويقدم ليه حلول مقترحة .
دا أهم سبب رئيسي يخليهم يبدأوا في الكتابة ... 
هيحكي الأول عن المشكلة دي ، أسبابها، وفي النهاية هيقدملك مقترحات ويربطها بالمنتج الخاص بيه. 
طب خلاص كدا يعني ممكن ميحصلش Call To Action 
بردو لا... هيحصل بس مش شرط دا يكون هدف أساسي أو التركيز عليه بشكل مباشر.. على قد ما الهدف منه تقديم معلومة. 
ونرجع نخلص تاني ونقلك إن الكونتنت رايتر بيكتب محتوى أغلبه معلومات وتثقيفي للقارئ في عدد كلمات أطول شوية الهدف منه مش البيع ولكن عشان يجذب أكبر قدر من العملاء ويهتموا إنت بتبيع إيه وبتقدم إيه من خلال المعلومات الحصرية الي بتقدمها....

طيب تفتكر إزاي تطور من أسلوبك في الكتابة؟🤔
استنى الإجابة في الجزء التاني 😉

إزاي تقدر تعمل خطة لشغلك على السوشيال ميديا في 6 خطوات !!

المحتوى دا يمكن يخص أكتر المبتدئين في مجال السوشيال ميديا واللي حابين يكملوا فيه بعد كدا.. بص الموضوع مش متوقف بس على إنك تكلم العميل وتعرف منه تفاصيل عن المنتج بتاعه وتعد تفكر بعدها إيه هي الحملات التسويقية الي تقدر تقدمها ليه ..!

في خطوة أهم من كدا وهي إنك لازم تعمل خطة لشغلك على مدار الشهور الي هتشتغل فيها مع العميل وتحدد كمان إيه نوع الوسيلة الي هتستخدمها سواء تويتر أو فيس بوك أو إنستجرام.

بس سريعاً كدا خليني أقلك هو يعني إيه خطة عمل للسوشيال ميديا و أهميتها إيه ليك وللعميل؟

خطة عمل للسوشيال ميديا هو خلاصة الشغل الي هتعمله على مدار الفترة الي هتتفق فيها مع العميل، ودي طبعاً لازم بتحدد فيها الفئة الي هتتواصل معاهم (سواء ذكور أو إناث، شباب أو كبار سن، الحالة الإجتماعية..إلخ) والأهداف الي عايز تحققها للصفحة الي هتشتغل عليها و إيه الأدوات الي هتستخدمها في شغلك.

دا بقى هيكون ليه نتيجتين:

أولاً بالنسبة ليك: الشغل هيكون بعد كدا سهل جداً ومنظم وتقدر ترجع للخطوات الي هنتكلم عليها بعد شوية ومش هتكون مشتت.

ثانياً بالنسبة للعميل: هيضمن إنه شغال مع شخص بروفيشنال وإن مش أي حد ماسك ليه صفحته وخلاص.

طيب إزاي تبدأ تعمل خطة العمل؟؟

الخطوة الأولى- حدد الأهداف الي محتاج تحققها خلال فترة شغلك مع العميل

لازم وإنت بتعمل خطة العمل وانت بتدرس الصفحة الي شغال عليها حاجة مهمة جدا وهي إنك لازم تكون محدد الأهداف الي هتحققها على الصفحة دي سواء إنم عايز تزيد من عدد المتابعين أو تعمل حملات توعية للمنتج أو إنك تزيد من نسبة الشراء.

هتسأل نفسك سؤال؛ إيه الي ممكن يحصل لو محددتش الأهداف ما أكيد أنا عارف إني لازم أزود عدد المتابعين على الصفحة وأزود نسبة الشراء؟

لو معملتش كدا هتعرض نفسك لتشتت كبير ومش هتقدر إنك تواظب بين زيادة عدد المتابعين وبين إنك تزود نسبة الشراء...من الآخر لازم تكسب ثقة العميل الي هيدوس لايك على صفحتك وبعجين إبدأ بيع ليه المنتج.

الخطوة الثانية – حدد جمهورك على السوشيال ميديا

أكيد بقى وإنت بتحدد أهدافك على الصفحة والمنتج لازم تبقى عارف حاجة مهمة "إنت مش بتبيع لكل الناس" يعني إيه؟

يعني لو في منتج معين إنت المفروض تسوق ليه لازم تبقى فاهم إنك مش هتلعب على كل الفئات العمرية ولا الطبقات الإجتماعية لازم تبقى محدد إنت عايز توصل للشباب ولا كبار السن ولا الموظفين ولا ربات البيوت.... زي الصور دي

 

 

هنا إنت عملت جدول وحطيت فيه كل البيانات الي محتاجها عن العملاء الي هتشتغل عليهم (السن ، النوع، الحالة الإجتماعية، نوع الموبايل الي بيستخدموه، اللغة، الدولة ..) وعلى فكرة الكلام دا مش على الفيس بوك بس الكلام دا ماشي على كل أنوع السوشيال ميديا الي موجودة.

الخطوة الثالثة – إبدأ إختار وسيلة السوشيال ميديا الي هتشغل عليها

إنت كدا الحمد لله ربنا كرمك وظبط تقريبا نص خطة العمل الي هتشتغل عليها ..فاضل أهم خطوة وهي إنك تختار وسيلة السوشيال ميديا الي هتشتغل عليها .

خليني أقلك إن مش كل وسائل السوشيال ميديا تصلح للعمل على كل المنتجات أو الخدمات ؛ حاجة كمان إنت لو شغلك برة مصر هيختلف تماما في إختيار الوسيلة.

طيب الصور دي فيها تقريبا أخر الإحصائيات لنسب السوشيال ميديا من حيث الوقت الي الناس بتعد عليه والفئة العمرية وأكتر الوسائل إستخداماً.

خلي بالك النسب دي مش ثابتة وبتتغير باستمرار ومش بتتغير كل سنة ولا كل كام شهر لا إنت لازم على الأقل كل شهر تتابع تطور الإحصائيات للسوشيال ميديا .. وفي الآخر هحطلك كام لينك تقدر تتابع عليهم تطورات السوشيال ميديا.

الخطوة الرابعة -  إعرف المافسين الي حواليك

مينفعش تبدأ شغلك من غير ما تكون عارف مين المنافسين الي معاك في نفس مجال العمل سواء على أرض الواقع أو على السوشيال ميديا.. إنت لازم قبل ما تبدأ تبقى متابع كل تفاصيلهم وعارف هما بيقدموا إيه للعملاء ، هما ليهم كام أكونت على السوشيال ميديا ..

مش بقلك كدا عشان تروح عامل زييهم من أفكار أكيد لا .. بس على الأقل هتبقى عرفت هما بيفكروا إزاي بعد كدا "من الآخر تبقى إنت مسابقهم بخطوة" .

الخطوة الخامسة – فكر في محتوى تقدمه للمتابعين

الممثل أحمد حلمي كان ليه جملة في فيلم على جثتي ، كان بيقول إيه بقى "فكر قبل ما تتكلم .. فكر 5 ثواني قبل ما ترد" معناه إيه بقى الكلام دا...؟

معناه إنك لما تقدم محتوى للعميل والمتابعين على الصفحة لازم تبقى فكرت كويس أووي في نوع المحتوى الي هتقدمه – أكيد مش هتفكر خمس ثواني إنت هتاخد حبه وقت أكتر – يعني مش علشان العميل دا عنده محل ملابس فتقوم تقله إحنا هنزل كل يوم بوست لصورة من المنتج ونكتب عليها السعر والتفاصيل وإنتهى الموضوع على كدا.

دا لو هو المتابعين على الصفحة مزهقوش العميل نفسه هيزهق وينهي معاك الشغل ... إنت لازم تحط في دماغك أفكار لكامبين تفرقع الدنيا أيوة تفرقع الدنيا على السوشيال ميديا تخلي المتابعين نفسهم يطلبوا المنتجات حتى ولو توصلهم أون لاين لو هما في محافظات أو دول تانية..

إعمل حسابك إنك مش هتقدر تحدد جمهورك بيحب إيه غير لما تدخل وسطهم (زي ما قلت على موضوع المنافسين نفس الكلام للمتاعبين) لازم تعد تدور وتعرف هما بيحبوا إيه وبيكرهوا إيه في كل حاجة.

الخطوة السادسة – قييم شغلك على السوشيال ميديا

إنت كدا الحمد لله مسكت شغل في إيديك ، العميل راضي عنك ، الصفحة شغالة زي الفل .. مش فاضل غير إنك تعمل تقييم لشغلك، إنت المفروض كل شهر تعمل تقرير تحلل فيه شغلك الفترة الي فاتت سواء من إيجابيات أو سلبيات .

أكيد لو إيجابيات فدي حاجة لمصلحتك وهتحاول إنك تحسن أكتر وأكتر من شغلك ولو سلبيات فبردو أكيد هتكون عايز تعرف إيه الأسباب الي أدتت لدا.

أنا كدا تقريباً خلصت ... عايزة أقلك إن النقط دي مكتوبة بشكل مختصر تفيدك لبداية شغلك لكن الموضوع أكبر من كدا شوية ممكن كل نقطة من دول تتكتب في مقال لوحده .

ملحوظة : في الخطوة رقم 3 أنا قلتلك هحطلك لينكات لمصادر تقدر تتابع عليها الإحصائيات

https://hootsuite.com/

http://www.socialmediaexaminer.com/

https://www.agorapulse.com/

المصدر: https://blog.hootsuite.com/how-to-create-a-social-media-marketing-plan/